زيارة لبيت سيد درويش
steal المكان : حارة العسال بكوم الدكة الزمان : النهاردة الصبح قبل ال
أقولكم ايه حارة شعبية مصرية بجد
لما رحنا طبعا ماكناش نعرف أى حاجة من أى حد بس اهى تجربة وطبعا سألنا؟
أول حاجة سألنا عليها قهوة منعم اللى قال عليها بشمهندس أحمد حسين بس مالقيناش حاجة بالإسم ده لكن طبعا كان فيه قهاوى كتييييييربصراحة ماكانش فيها أكتر من القهاوى
المبانى قريبة جدا من بعضها لدرجة انه بيتهيألى لو حد مد ايده من شباكه ممكن يدخلها فى البيت اللى قدامه
أما الشوارع بأة فحدث ولا حرج ماتعرفش الشارع ده أصله نازل ولا طالع لإن مافيش حاجة أصلا اسمها ان الشارع يمشى عدل أساسا
وما تتخضش لو لقيت نفسك مرة واحدة واقع فى حفرة أو بير
لكن كل ده مش مهم المهم ان احنا أول ما دخلنا الحارة حسينا بجد اننا دخلنا بيت عيلة من البيوت اللى هناك بس الفرق انه بيت كبير وفيه ناس كتير
الناس كلها عارفة بعض وعايشين مع بعض بجد احساس غريب وجميل
طبعا مش عايزة أقولكم أد ايه الناس كانوا متفاهمين معانا ومتساهلين فى الكلام وكل ما نسأل واحد عن مكان بيت سيد درويش يقوم جرى من مكانه علشان يوصلنا
ده حتى بتاع الفلافل واحنا ماشيين عزم علينا بس احنا اللى مالناش نصيب
المهم مش حأطول عليكم وحأدخل فى النقطة المهمة بيت سيد درويش نفسه
وسألنا الناس عن البيت وكانت الوصفة بعد الفحص والمحص والتمحيص روحوا فى الإتجاه ده وحتلاقوا هناك (عمارة بيضا) ادخل من عندها يمين وامشى على طول تلاقى جامع أول ماتلاقى الجامع تدخل شمال فى يمين حتلاقى بيت صغير سيبه وادخل يمين ربنا بسهل يمكن تلاقى البيت فى الوش
بس الحمد لله لقينا البيت فى الوش صحيح ماكانش فيه عمارة بيضا ولابيت صغير والجامع طلع كورنر حتى مش زاوية بس المهم لاقينا البيت
البيت عبارة عن خرابة!!!مجاملة للشيخ سيد الله يرحمه بيقولوا عليها مبنى آيل للسقوط
أنا بيتهيألى ان البيت آيل للسقوط من أيام سعد زغلول ولا كليبر
طبعا مش عايزة أقولكم الإنطباع (بعد الدوخة ديه والصحيان بدرى والنزول والبهدلة أروح أتفرج على خرابة!!!)يللا زى بعضه
بس البيت هيكل قديم عبارة عن حوائط وفى النصف بيستعملوه كمقلب نفايات
ومساحته صغيرة جدا تقريبا البيت كان مربع أو مستطيل ربع
أما بأة واحنا مروحين الناس كانت كترت فى الحارة وكله بيفطر من عند بتاع الفلافل اياه
ومش عايزة أقولكم كانوا بيبصولنا ازاى ؟؟؟
وشوفنا أم اسماعيل وهيه بتنده على أم أحمد وبتسألها إذا كانت عايزة حاجة من السوق ولا لأ
هوه ده الموقع وهوه ده المكان اللى عاش فيه سيد درويش بصراحة مش زى ما تخيلته خالص ده حتى فيه ناس مننا كانوا فاكرين ان الكلام ده والعيشة ديه فى الأفلام وبس. بس علشان تتخيلوا انتوا كمان بعد شوية حنبعت صورالبيت اللى صورناها والناس كان لسان حالهم بيقول
ايه الهبل دول اللى بيصوروا الخرابة؟؟؟
معلش طولت عليكم بس حبيت أحكيلكم عن رحلتنا الصغيرة لبيت الشيخ سيد يمكن تفيد حد و يمكن اللى مايقدرش يروح يكون اخد فكرة عامة ويا رب تكون وصلت
posted by MoNaAa @ 11:04 pm
2 Comments:
قشطة عليكى يا منى
وصلت الصورة
كلام جميل . كلام معقوووووول مقدرش أقول حاجة عنه بس إزاااااي تروحي ناقصة منغير بقيت صحابك
Post a Comment
<< Home